Lea-Artibai eta Mutriku

Saturraran, Mutriku eta Hondarbeltz. Horrela banatzen dituzte bai DYAkosorosleek, bai hondartza garbitzaileek herriko hondartzak dauden hiru gune nagusienak. Haietaz gain, hondartza eta haitza batzen dituen bestelako guneak ere badaude ¬ zazpi hondartzak, esaterako ¬, baina horietan ez da espero topatzea besteetan topatu nahi diren azpiegitura eta zerbitzuak. Hainbat artista inspiratu dituzten inguruak, aisialdirako txoko ederrak direnak, utzitako itxura hartzen ari dira. Eta ez garbitasuna falta zaielako, baina bai inguruetan nolabaiteko utzikeria sumatzen delako.

Hondartza bakoitzak edertasun propioa duen bezalaxe, bakoitzaren egoera ere propioa da, eta tamalez, ez da erraza inguruak balorean jartzeko egin beharreko ibilbidea. Izan ere, eskuduntza zuzena Kosten Sailarena da, eta haren baimenik gabe ezin daitezke, esaterako, ingurua biziberritzeko planak garatu. Hondartzen garbiketa, ordea, Diputazioaren esku dago. Honek era berean, Zerbitzu izeneko enpresa baten esku lagata dauka. Hiru langile eta hondarra galbahetzeko makina bat jarri dituzte aurten hiru guneak egiteko. Debako hondartza ere haien esku dago, eta «jendea hondartzara gero eta goizago doanez», 07:00etan hasi beharrean, borondatez, hondartzen arduraduna 06:00etan eta 05:00etan ere hasi izan da lanean. «Harriak dira gure trabarik nagusiena. Harri handiak dauden lekuan ezin dugu sartu makina. Tarteka, gure lana ez izan arren, harri piloak atera izan ditugu, baina horretan hasten bagara, noiz garbituko ditugu hondartzak?». Azkenik, Udalak kantinen (Mutrikuko izan ezik) gestioa darama eta haien inguruan jartzen diren umeentzako jolasen eta parkeen arduraduna da.