Lea-Artibai eta Mutriku

Urte askoan elkarrekin aritu ziren Braulio Buenetxea eta Bittor Furundarena. Batak egurra zizelkatzea zuen maite; besteak berriz, margotzea. Furundarena hil zela hamar urte bete direnean, Buenetxeak, emandako hitza betez, omenaldi xume bezain ederra eskainiko dio.

Lagun bati eman ahal zaion oparirik ederrena eskainiko die Furundarenaren familiakoei, bihar, 12:30ean, Atxukalean: bere eskuz zizelaktutako taula, Furundarena beraren aurpegia ageri duelarik.
Buenetxeak ederki gogoratzen du bere lagun mina. «Begiak ireki genituenetik elkarrekin ibili ginen. Berari kuadroak egitea gustatzen zitzaion, eta bizi guztia eman zuen horretara». Furundarenak, ordea, bazuen pena bat, eta lagun onek egiten duten bezala, Buenetxari kontatu zion: «Hiltzen naizenean, gustatuko litzaidake herria nitaz oroitzea. Baina Udalak edo dena edo ezer ez egiten duenez...».

Gauza handirik ez
Furundarenak ez zituen sekulako ohoreak eskatu. Bizi zen etxean plakatxo batekin nahiko izango zela aitortu zion lagunari.
Horren aurrean, Buenetxeak promesa bat egin zion: «Hil eta hamar urtera Udalak zure oroimenez ezer egin ez badu, nik neuk egingo dizut zerbait. Plakak jartzea eta, ez dago nire esku, baina egurra da nirea, eta harekin egingo dizut zerbait».
1998ak herriko margolaria eraman zuen. Aurten haren heriotzaren urteurren borobila betetzen da: hamar urte.


Oroimena berreskuratuz
«Udalak ez bada, Kultur Etxeak bada ere», esaten zion lagunari. Baina ez Udalak ez Kultur Etxeak, ez beste inork, ez dio ezer prestatu.
Mutrikutik Zarautzera joan zela 40 urte pasa diren arren, gogoan zuen Buenetxeak esandakoa, eta hamar urte pasa zirela ikustean, duela hilabete, egur zatia hartu eta lanari ekin zion. «Familiak bazekien gure arteko tratuaren berri, eta zizelkatzen hasi aurretik, bere ilobarekin hitz egin nuen».
Eta ilobak izango dira, hain zuzen ere, bihar, Buenetxearen eskutik osabaren oroimenez egindako lana jasoko dutenak. Hitzordua heldu bitartean, Furundarenaren aurpegia grabatuta daraman egur zatia Atxukaleko estankoko erakuslehioan dago. Herritar guztiek ikusi eta herriko margolaria zenaren oroitzapena gordetzeko.