Lea-Artibai eta Mutriku

«Kapitalismoan oinarritutako bizi eredu inposatuen» aurrean, euren nahia zein den argi azaldu dute, gaur, herrian batu dien zortzi gazte asanbladetako kideek: herri nortasunari eustea.

Gazteek euren aldarrikapen eta kezkak kalera ateratzeko baliatu dute gaurko eguna. Mutrikuko asanbladarekin, Lekeitiokoak, Aulestikoak, Berriatukoak, Markina-Xemeingoak, Ondarroakoak eta Etxebarrikoak bat egin dute. Guztira, 110 gazte helburu garbi batekin: herriz-herri garatzen ari diren «proiektu txikitzaileei» aurkakotasuna adieraztea.
Aldarrikapenen muina portu berria, eta gazteek hari lotuta datozela ulertzen dituzten proiektuak ¬esaterako, Mutriku-Sasiola eta Olazko harrobia¬ izan dira. Proiektu horien aurka daudela adierazteaz gain, euren arrazoiak eman nahi izan dituzte. Horretarako, Atxukalean batu dira.
Portua polemika handia sortzen duen gaia dela agerian gelditu da. Izan ere, gazteak hizketan ari zirela, portuaren aldeko zenbait herritar agertu dira Atxukalen, eta modu guztiz desegokian zuzendu zaizkie.
Gazteek, euren aldetik, lasaitu, eta portuaren aldeko argudioak emateko aukera eskaini diete. Baina gazteak izan dira, hitz egiteko borondatea dutela agertu duten bakarrak.

Herririk herri
Atxukalea portuaren aurka zergatik dauden azaltzeko gune bihurtu den bezala, herriko beste zenbait txokok ere gauza berdinerako balio izan dute. Asanblada bakoitzak euren herrian aurrera doazen proiektuen eta haien inguruan sortutako kezken eta mugimenduen berri eman dute.
Lekeitiarrak izan dira herrikoen atzetik hitza hartzen lehenak, eta Beheko Plazan saihesbideaz hitz egin dute. Zabiel plazan, berriz, Aulestiarrak haize erroten proiektuari buruz aritu dira.
Azkenik, Gaztetxe aurrean, berriatuarrak, markina-xemeindarrak eta ondarrutarrak etxebizitzen inguruan euren herrietan ikusten duten "hazkuntza neurrigabeari" buruzko informazioa eman dute.

Ikasi eta ondo pasa
Topaketak herri bakoitzeko kezkak eta mugimenduak ezagutzeko eta indarrak bateratzeko aukera emateaz gain, ondo pasatzeko tartea ere eman die gazteei.
Aldarrikapenak eta jaiak batera egin daitezkeela erakutsiz, herriko kaleetan bertso-triki-poteo alaian ibili dira, eta elkarrekin bazkaldu ondoren, proiektuei buruz ikasitako guztia proban jarri dute galderen jolas baten bidez. Eguna amaitzeko deituta dituzten manifestazioa eta ekitaldia egin aurrean, emaitzarekin pozik agertu dira asanbladetako gazteak, eta aurrerantzean, herrika, horrelako ekimenak egiteko asmoa erakutsi dute.