Mutrikuko Hitza

Mutriku Zero Zabor taldearen aurkezpena izango da etzi, Luardo Etxean

Larraitz Ibaibarriaga — Wed, 16 May 2012 16:12:32 +0000

Hondakinen bilketaren gaia mahai gainera aterata, Mutriku Zero Zabor taldearen aurkezpena egingo da barikuan, Luardo Etxean. 18:30erako egin dute hitzordua udal ordezkariek.
Taldeak dituen helburuak eta nondik norakoak azalduko dituz

Beheko Plazako igogailuaren ordutegia bi orduz zabaldu du udalak

Larraitz Ibaibarriaga — Wed, 16 May 2012 16:11:08 +0000

Gauerdira arte dago zabalik Beheko Plaza eta moila batzen dituen igogailua.
Mutrikuko Udal ordezkariek herritarren eskariari erantzun nahi izan diote aldaketagaz. Izan ere, 150 sinadura aurkeztu zituzten udaletxean, igogailua ordu gehiago martxan egon zedin.

Igoera faseko azken partidua ikustera joateko autobusa aterako du SBBk

Larraitz Ibaibarriaga — Tue, 15 May 2012 15:07:48 +0000

Iruni 1-0 irabazi eta gero, igoera faseko azken partidua jokatuko du zapatuan, SBB mutrikuarrak taldeak Berako Gure Txokoa taldearen aurka. Partidua 18:00etan hasiko da.
Ligan izugarrizko maila erakutsi ondoren, partidu erabakigarria daukate aurretik mutrikuarrek: irabazten badute mailaz igotzeko aukera edukiko dute, eta berdinketa lortuz gero, igoera promozioa jokatzeko aukera.
Denboraldiko norgehiagoka garrantzitsuenaren aurrean, euren ondoan nahi dituzte zaleak. Hartara, partidura joateko autobusa ipiniko dute. Loretxun, Badi bodegoian, Bar Puerton, Zubiaramen eta Goitibera tabernetan emon ahal da izena. 18 urtetik gorakoek 7 euro ordaindu beharko dute autobusa, eta 18 urtetik berakoek 3 euro, izena emoteko unean bertan.
Zaletuen autobusa 16:00etan aterako da, beheko geltokitik

Zumalabe azpiko hoditeria konpontzen dabiltza, urak gainez egin ez dezan

Larraitz Ibaibarriaga — Tue, 15 May 2012 15:02:17 +0000

Zumalabe azpiko kainua konpontzen dabiltza egunotan, bertatik Kofradia Berriraino urak eragiten zuen arazoari irtenbidea ematea helburu. Eusko Jaurlaritzako Ur Sailaren eta Portu Zuzendaritzaren artean daramate aurrera obra.

Hondartzen moldaketa egin beharko du uda aurretik Eusko Jaurlaritzako Portu Zuzendaritzak

Larraitz Ibaibarriaga — Tue, 15 May 2012 14:59:46 +0000

Uda denboraldia hasi baino lehenago Mutrikuko hondartzen moldaketa egin beharko du Eusko Jaurlaritzako Portu Zuzendaritzak. Erabakia Espainiako Kosta Zuzendaritzak hartu du, eta Mutriku Natur Taldeak Gipuzkoako Fiskaltzari jakin eragin dio, «ahal bezain pronto» gaiari kolpe egin diezaion.
Espainiako Kosta Zuzendaritzaren erabakiari jarraituta, hiru dira portu zuzendaritzak egin beharko dituen moldaketak. Alde batetik, hondartza berriaren egitasmoa moldatu beharko du, 2004 urtean onartu bezala, granulometria egokiko hondarra gehituz.«Portu zuzendaritzak ez du hori bete, nahiz eta behin baino gehiagotan ahalegindu diren hori justifikatzen», adierazi du MNTk. Beste alde batetik, Burumendiko hondartza berreskuratu beharko dute, beti ere uda denboraldia baino lehenago. Azkenik, Eusko Jaurlaritzak urtero egin beharko du –hamar urtean jarraian– hondartza bien azterketa, orekarako baldintzak lortu arte.

Mozioa Mutrikuko Udalera
Gaiaz kezkatuta, Berdeak+Independienteak plataformak mozioa aurkeztuko du Mutrikuko Udalean, «herriko alderdi guztien artean udako denboraldia hasi aurretik hondartzak egokitzea

Plazatik Gaztetxera: Aimar Karrika eta Maddi Sarasua izan dira irabazleak

Larraitz Ibaibarriaga — Mon, 14 May 2012 13:17:33 +0000

100 entzule, giro itzela, txaloak, eta bertsoak aukeran. XI. Plazatik Gaztetxera bidea egiten hasi zen zapatuan, Mutrikuko Gaztetxean. Lehenengo kanporaketan Aimar Karrika eta Maddi Sarasua izan ziren nagusi.
Iragarri bezala, sorpresaz eta berrikuntzaz beterik heldu zen lehen saioa: bertsolariak binaka lehiatu ziren, eta entzuleek bertso gosez zeudela agerian utzi zuten. Andoni Zubiaurre mutrikuarra bikain estreinatu zen bere lehenengo ofiziokoan.

Lur gaineko Euskadiko Sokatira Txapelketa etzi hasiko da, Galdonan

Mutrikuko Hitza — Thu, 10 May 2012 15:19:41 +0000

Talde mutrikuarra 680, 640 eta 600 kiloko modalitateetan lehiatuko da; aurkariak iazko berberak izango dira.

Txapelketan parte hartuko duten taldeak azken urteetako berberak direla iragarri du txapelketako antolakuntzak. Txapelketan 680, 640, 600 eta 580 kiloko modalitateak egongo badira be, talde mutrikuarra 680, 640 eta 600 kiloko modalitateetan lehiatuko da.
Bihar, Galdonan
Zapatuan, Galdonan, 680 kiloko lehenengo saioa jokatuko da, 17:30ean. Bi ordu lehenago aldiz, 15:30etik eta 16:30era, taldeen pisaketa lanak egingo dituztela iragarri du antolakuntzak.
Txapelketaren hasiera berton, Mutrikun, egingo bada ere, gainontzeko saio guztiak Bizkaian egingo dira.
680 kiloko jardunaldiak maiatzaren 26an amaituko dira, Iurretan. 640 kiloko finala Leioan jokatuko da, ekainaren 23an eta 600 kiloko finala Getxon jokatuko da, uztailaren 14an.

Igor Romerok Circuit de Lorrainen parte hartuko du, «gogo handiz»

Mutrikuko Hitza — Thu, 10 May 2012 15:17:25 +0000

Txapelketa maiatzaren 16tik 20ra egingo da eta Romero han egongo da, lehiatzen. Norgehiagokarako gertu eta gogotsu dagoela esan du. «Gogo handiz eta ilusioz joango naiz».

Birus baten ondorioz denboraldi baten txirrindua aparkatuta eduki eta gero, Romero indarberrituta dator. «Maiatzaren azkenetan txapelketa bi egiteko asmoa nuen baina taldeko teknikariek eta medikuek prest nagoela esan didate eta ondorioz hilaren 16an, eguaztenean, Circuit de Lorrainen parte hartuko dut».
Entrenamendu luzeak duela bi aste hasi zen egiten mutrikuarra. «Medikuek esan zidaten normaltasunera buelta egin behar nuela eta hori egin nuen».
Dena den, pasatutakoak pasatuta, bere osasun egoeraren jarraipena egiten jarraituko dutela esan diote medikuek. «Komeni da kontrolatzen egotea», dio mutrikuarrak.
Helburua: Lorraine
Lorraineko zirkuitua gora beheratsua dela dio Romerok. «Luxenburgorekin mugan dago eta aldapa handirik ez badu be, ez da guztiz laua». Iaz ere zirkuitu hori egin zuenez, zirkuituaren zailtasun maila ezagutzen duela dio txirrindulari gazteak.
Aurrean duen erronkari ekiteko «gogotsu, indarberrituta eta ilusioz» dagoela dio mutrikuarrak. «Momentuz helburu bat finkatuta daukat eta horri eutsiko diot».

Hilaren 14an banatuko dira Uda Kanpainaren egitaraua

Larraitz Ibaibarriaga — Fri, 04 May 2012 11:00:30 +0000

Maiatzaren 14tik 31ra bitartean eman beharko da izena Uda Kanpainan. Antolatzaileek azaldu dutenez, hilaren 14tik aurrera banatuko dira izena emateko orriak, aurtengo programarekin batera.

Zero Zabor-en aldeko apustua eginaz, bilerak egingo ditu udalak auzoz auzo

Larraitz Ibaibarriaga — Thu, 03 May 2012 11:00:54 +0000

Etorkizuneko hondakinen kudeaketa sistema gai hartuta, agerraldia egin zuen atzo, udaletxeko batzar aretoan, Mutrikuko Bilduk. Joxean Agirregomezkorta gobernazio batzordeburuak, Joseba Palenzuela alkateak eta Jaione Peña ingurumen batzordeburuak hartu zuten hitza.
Esan zutenez, hondakinekin osasuna eta ingurumena kaltetzen dituen arazo larri baten egoeran dago gizartea, eta horri aurre egiteko, hamalau herritan onartu dute hondakinak beste modu batera biltzea, %80ko birziklatze maila ahalbidetuz: Legorreta, Segura, Zizurkil, Villabona, Zumaia, Irura, Legazpi, Lazkao, Anoeta, Oñati, Lezo, Bergara, Ormaiztegi eta Astigarragak. Herri horiek Zero Zabor norabidean jarri nahi dituztela azaldu zuten, hondakina zabor gisa ulertu beharrean, baliabide bezala ulertzen duen ikuspegia txertatu nahian.
Izan ere, hondakinen kudeaketan beste eredu bat posible ez ezik, derrigorrezkoa ere badela uste du koalizioak: «Zabortegiak gainezka daude, eta errausteak ez du arazoa konpontzen, arazoa larriagotu baino ez du egiten. Gure lurraldea jaso duguna baino hobeto utzi behar diegu gure ondorengoei. Gure seme-alabei ezin diegu horrelako hipoteka utzi». Horren harira, udal ordezkarien betebeharra ingurumena eta herritarren osasuna zaintzea dela esan zuten, eta «erantzukizunez», hori egitera doazela gaineratu.
Errazena, ez aldatzea
Gipuzkoako EAJk, PSE-EEk eta PPk planteatzen dutena –hondakinak zabortegira nahastuta eramatea edo errauste planta batean erretzea– bide errazena dela iritzi dio Bilduk. «Orain arteko ereduarekin jarraitzea arazoari ihes egitea da». Betiko formularekin jarraitzea, hortaz, arduragabekeriatzat jo zuten, Zero Zabor-en aldeko apustua egitea arazoari adarretatik heltzea dela iritzita: «Arduratsu ari gara».
Aldaketa helburu, hondakinen tratamendua aztertu eta politika berri bat ezartzen hasi direla azaldu zuten, beti ere, «erakundeen kudeaketak eskatzen dituen erantzukizunei aurre eginez».
Politika hori herritarrekin batera ezartzen hasiko direla argi utzi nahi izan zuten, arazoa guztiek sortzen dutelako, eta arazoari konponbidea guztiek eman behar dietelako. Horren ildotik, herritarrak arazoaren jabe izan daitezen eta konponbide egokiena zein den ikus dezaten lan egingo dutela nabarmendu zuten.
Intoxikazio kanpaina
«Komunikabide eta alderdi batzuek sortu duten burrunba mediatikoari eta gezur eta intoxikazio kanpainari ihes eginez», euren herrietan murgilduko direla azpimarratu zuten, kalitatezko parte hartze prozesuak abian jarriz, hondakinen gaia denen lehentasunezko gaia izatea ahalbidetuz eta gaur egun dagoen egoeraren informazio guztia eskainiz, «beti ere, informazioa ona, zabala, gardena, objektiboa eta kalitatezkoa izan dadin». Herritarren ikuspegi ezberdinak partekatuko dituztela, iritziak elkartrukatuko dituztela eta errespetuz eztabaida kolektiboak bideratuko dituztela ere ziurtatu zuten.
Horretarako, Mutrikun, auzoetako batzarrak izango dira abiapuntu, eta gero, ikastetxe, denda, jatetxe, taberna, elkarte gastronomiko eta industrialdeetako enpresekin batuko dira udal ordezkariak. «Jakin badakigu herritar batzuk bilketa modu honen aurka azaldu direla. Sinadurak biltzen hasi dira. Iritzi guztiak dira errespetagarriak, eta guztiak hartuko ditugu aintzat. Eurekin batera ere lan egingo dugu».
Elkarlan horretarako deia ere egin nahi izan zieten EAJri, PSEri eta PPri, atez atekoa ez dela Bilduk asmatutako ezer gogoratuz. «Beste herri eta herrialde askotan ari dira horixe egiten». Horri lotuta, Roberto Jimenez PSNko idazkari nagusiak eta Nafarroako Gobernuko presidenteordeak esandakoa aipatu zuten: «Errausketa baztertzen dugu, garestia delako, kutsakorra delako eta gizartearen gehiengoak errefusatzen duelako». Yolanda Barcina presidenteak eta UPNko buruak premisa horrekin bat egin zuela ere ekarri zuten gogora. «Bi adibide baino ez dira. Baina bi adibideok erakusten dute hondakinek ez daukatela kolore politikorik, eta errausketaren alternatiba martxan jartzea ez dela Bilduren asmakeria, ez dela gure burugogorkeria».
Hori abiapuntu hartuta, zaborren gaia joko zelai politikotik atera beharraren garrantzia azpimarratu zuten, gai horren politizazioa gaindituta, bestelako kudeaketa eredu bat ahalbidetzea guztien erantzukizuna eta ardura politikoa dela esanaz, beti ere irizpide eramangarrietan oinarrituz. «Errausketa iragana da. Etorkizuna beste parametro batzuetatik eraiki behar dugu».

AUZO BATZARRAK
Maiatzak 9
Udaletxeko batzar aretoan, 19:00etan. Erdiko kale, Konde kale eta aldapa, Beheko plaza, Barrenkale, Ipar kale, San Gil, Frontoi kalea, Sabanika, Azkiaga, Tranpa kale, Nasa kalea, Piñastegi, Portuko kalea, Ibirriaga.
Maiatzak 10
Udaletxeko batzar aretoan, 19:00etan. D. Ibaibarriaga, J. M. Altzibar, Agirre Lehendakaria, Gaztañeta, Entzus, San Migel, J.M. Ezeiza, Goiko Plaza, Txurruka Tenienteak.
Maiatzak 16
Udaletxeko batzar aretoan, 19:00etan. Kanteratzea, Iriagirre, San Agustin, Urazamendi, Pikupe, Hirigibel, Samikolla, Goiko Arba.
Maiatzak 17
Udaletxeko batzar aretoan, 19:00etan. Astigarribia, Olabarrieta, Ibiri, Olatz, Mijoa, Galdona, Laranga.